البعيد دلدول

جمال

يغور المواطن اللى كله غباوة
أعمى القلب وعينه عليها غشاوة
اللى يؤيد من غير مافاهم حاجة
وكأنه عايش فى جزيرة جاوة

أمل

مواطنين مزارع علفوهم بالفول والطعمية
متلومش عليهم دول في ساقية والعين متغمية
لو في حد فك غماهم كانوا شافوا ووعوا
لكن الكل شبه بعضه بيدور على حلاوة طحينية

جمال

المواطن اللى همُّه رغيف وبجنيه فول
دا راجل لا قلنا عليه كلام ولا هنقول
الكلام ع اللى بيوافق .. واللى بينافق
أقل ما يوصف بيه .. إنه البعيد دلدول

وعجبي

عمك غباشي

جمال

تفتكروا الرومانسية ناقصة فى السوق ؟ .... أنا مافتكرش
الرومانسية بتتباع على شكل مسحوق .. الكيلو منها بقرش
لما الطلب ع الرومانسية أكتر من المعروض ...
ليه الستات شجر جميز .. والرجّالة كله بكرش ...!! ؟

أمل
كله بيضحك على كله وتعالى وشوف
الحب دلوقت برشام وكمان ....سفوف
لا رومانسية بتنفع ولا حتى.. الضرب 
الفقر كمان حتى في ......لمس الكفوف

جمال

لو صادفتى الحب ماشى .. قوليلـُه بيسلم عليك
وقوليله عمّك غباشى ... مزعّلاه دمعة عينيك
واسأليه ليه اختفـَى ...... وليه ضاع الوفا ..؟
بلـّغيه عمك غباشى ..... من كل قلبه بيواسيك

ماستر

قالو لغباشى اتلهى ... حب ايه يا جعان
العقل والقلب انشغل .. برغيف وقروان
الحب ده للدلع .. والدلع اتنسى من زمان
يا غباشى شد لحافك وبلاش تنام عريان

أمل

وماله لما غباشي يحب هو يعني مالهوش قلب
ولا حُرُم في زمن المادية مش كفاية علينا غُلْب
يبقى طابور عيش ونغمس في القروانة مافيش
ولمايحاول يرتاح تحرموا عليه قزقزة اللب

جمال

بس غباشى ليه يتلهى .. مش برضو دا إنسان .. ؟
مش من حقه يعيش .. ويبقالـُه بين الأمانى مكان ..؟
مش كفاية غدر الزمان .. هيدفن مشاعره كمان ..؟
لا هوَّ اتخلق من حجر ..... ولا قلبه كان صوّان

وعجبي

غراب لقيط

 

 جمال

غراب مجهول النسب .. يعنى غراب لقيط
معروف الغراب .. طير طول عمره حويط
جاى يلقـّح جتته .. وقع الغبى ف الفخ
غراب غبى بعيد عنكم .. إسمه جلعاد شاليط

أمل

مجهول مهبول أهو أهله في الآخر شاريينه
الرك على الغالي اللي إحنا يا خسارة بايعينه
ماأخدنا غير الكلام هو اللي تمللي سامعينه
الواحد عندهم بمِيـِّة آل يعني بالغالي فاديينه

جمال

.. ماهو الغراب ف عين امه غزال حتى لو مصَدّى
علشان شاليط اللقيط .. حاصروا شعب ومستمرين ف التحدى
.. كل بلاد الدنيا ستر وغطا على ولادها.إلا البلددّى
اللى يقعد تمرر عيشته ... واللى يمشى تقول المركب اللى تودّى

وعجبى

 

 

 

 

مالِك يا أم الدنيا

 جمال

 !! مالِك يا أم الدنيا .. بقى توبك ليه هلاهيل ؟
إيدِك ليه على خدّك ؟ .. ماتقومى شدّى الحيل
!! ليه الأسى يابهية !! .. مالِك كفى الله الشر
دا لابد النهار ماهيطلع .. مهما يطول الليل

أمل

مستنية من زمان وأقول الحال ....هايتغير
يأست والله يا بني وطعم الحلاوة ...بيمرر
أشوف ابني بدل مايبني يضيع ......ويهدر
أحط ايدي على خدي واقعد أبكي واتحسر

 جمال

بلاش اليأس يابهية ......... خليكى متفائلة
قومى انهضى ياصبية .. ياللا خليكى عاقلة
!!.. قاعدة إيدِك على خدّك .. وعمّالة تتحسّرى 
سايبة ولادِك يسرقوا .. وانتِ مش سائلة ..؟

ياخسارة الفن الجميل !!!!

جمال

ياخسارة ع الفن .. لما الفن يبقى وضيع
ويشوّه جمــال الفن .... واحد اسمه وديع
ويعمل منه مرتع للسفالة .. ويخلـّى قيمته تضيع   

ويصيبك الغثيان بسببه .. وتتعب من الترجيع

 أمل

يا خسارة لما الفنان يبقى قلبه...... ألوان
ويقول كلام كله بتنجان....... في بتنجـان
والناس حواليه تصقف.. وتقوله كماااااااان
العقول ضربت ياربي ولا كله جناااااااااان 

 جمال

 

ياخسارة ع الفن .. لما يبقى كده تفاريح
... ياإما كله هجايص .. ياإما فسق صريح
... ونشوف ونسمع فن .. لأ دا إسمه عفن
ياخسارة مات الفن .. إمتى يقيموله ضريح ؟؟

 جمال

.. الفن دلوقتى أصبح كله ... سيريالى

واستعراض لحَبة شَغت على لحم. عَجّالي

... وكل ما الفنانة تعرّى حتة....... زيادة

تبقى نجمة بسرعة .. وتاخد ختم الشهرة طوّالى

وعجبي

جرح الهوى

 أمل

كلمات كلمات شوية حروف وشوية حركات  

على شوية معاني حلوة و كمان...... سكنات   

هاقولهالك من قلبي لك أنت وأبطل.... سكات   

هاأحكيلك اللي راح من عمري وكل الحكايات

أمل

الجرح جواية بيعاند وماسك .....في حشايا   

أحاول أطبب وأداوي يرفض و يعاند معايا  

يا جرحي ارحمني وادفن معايا...... هوايا  

لا بإيدي ولا بإيدك هوانا راح وفاتك ويايا

جمال

ممكن للجراح تنتهى .. لو خدتى قرص غرام
وكمان مســاج للحب ........ بينسـّـى أى آلام
وحُقن تقوّى العشق ... تروح الجراح دى أوام
سيبك من الأعشاب ..... دى علاجها أى كلام

 أمل

جرح الهوى مالوش دوا اسألني...... يابَا

جرحه مايروح ولو غنيت له على الربابة

لا تقولي حقن ولا مساج إحنا...... غلابة

قولي مين ممكن يداوي مغرم...... صبابة

جمال

كــل جـــرح و له دوا ... حتــى جـــرح الهـــوى
عند طبيب القلوب .. ويكون طبيب على مستوى
وعلاجـه يحتاج سنين ... ماينفعـش فيه الفهلوه
حتـى اسألـى حــد ــ ف مـرة ــ داق مُــر الجَـوَى

 أمل

لا جوى ولا نوى قلبي من الهوى هوى

خليني فـ حالي أحسن كفياني......... ألم

غيرة الحبايب زادت وما طلت غيرالأسى

سامحوني يا حبايب هـ أكسر...... القلم

جمال

كسْـــر القلـم يزيـــد الألـــم ..... ويجيـب فـــوق الجـراح جــراح
فيــه غيــر القلـــم يحكــى ويفضفـض ؟ .. هـو دا اللــــى متـــاح
سيبــى القلــــم يحكـــى على راحتــــه .. بــس إنتِ إدّيلــه بـراح
وعلميه مفردات الهوى .. اللى ف القواميس المحيط أو الصحاح

وعجبي

 

جداريات

أمل

يا مصر يا غالية يا ساكنة جوة القلب ماتقولي

هو الصبر خلص ولا بيتباع اقول لحد يجيبهولي

أنا قلبي خلاص اتوجع من الهم واللي شيلهولي

إمتى ها تروق ولا نسلم ردي عليه بقى وقولي

أمل

على جدار العار ......ها أرسم جدار

اتدارى وراه واستخبى من ذل العار

على جدار المهانة.. هاأكتب وأقول

اللي بيجرى دا احتارت فيه العقول

جمال

على جـــدار العــار ... رســمت خطيـــن ســــود

حـــزن وحـــداد .. على الكـرامة اللى أكلها الدود

م احنـــا اتـكتــب علينـــا .. ندخـل نفـق مســدود

لكن معلشّ .. بكره هتنفرج وصفو المزاج هيعود

أمل

على جدار العار ها أكتب لأولادي.. كلمتين

مصري فلسطيني سوداني إحنا بني آدمين 

دينا واحد أصلنا واحد ولغتنا مش. لغتين 

ايدكم في ايد بعض وهدوا الجدار.. اللعين

جمال

على جــدار العــار .. هـ اكتب لأولادى كــلام

إن اليهــود خاينين .. وما ينفع معاهم سـلام

لا ف عهــد النبــى .. ولا بعــد مليــون عــام

حرقوا الزيتون من زمان .. وقتلوا كل الحمام 

أمل

على جدار الخيانة ها أكتب.......... وأقول 

لكل شيء نهاية ويعدي....... مهما يطول

واللي ظلم اليوم عن ظلمه..........مسئول 

ويوم الوعد قدام الخلايق.......... مخذول

وعجبي