أحلام

أمل

مد ليّه ايده مديت ايدي و.. بحَيا سلّـمت

رفعني لسابع سما ببسمته ...و ماتكلمت  

قلت ياربي باين عليّه في حبه اتشنكلت  

دا علـــْم ولا بايـن عليـّه نمـت وحلمت

جمال

رفعتِك ؟ .. لأ دا انتِ رفعتينى
يا أجمل من عنبى .....وتينى
حب إيه يا شيخة ....جننتينى
كان حلم جميل .. ليه فكـّرتينى ؟

جمال

إنما حلم .... كان كله حقيقة
والشوق ف العين, كل دقيقة
ودّانا بحور بس ....غريقة
وقلوبنا ف الحب ....جريئة

أمل

ياريت الحلم يدوم على طول
واسمع كلامك مهما..... تقول
وإن يوم زعلتك أنت المسئول
أصلك في الحلم كمان مشغول

جمال

أنا مشغول بيكى ف أحلامى .. حتى بدليل
ف الحلم انا شفتِك واقفالى فى قصر جميل
والقصر مزخرف باللولى وشبابيكه ع النيل
وعلى باب القصر الأنوار .....لمسافة ميل

جمال

وجيتلِك ماسك ورداية .......وراكب حنطور
بأمارة حتى ماقلتيلى.......... أهلا ياسى نور
وكان حواليكى الوصيفات........ داير مايدور
وكأنك فينوس فى جمالها أو واحدة من الحور

أمل

فاكرة بأمارة ماكانت الورداية  .... حمرة 
والحنطور جره فرس أبيض وأحلى مهرة 
واخدتني وياك في أحلى  .......جولة حرة 
الله عليك ياسي نور............ ياأغلى درة